عملت ريفريش للصفحة بتاعته فشهقت وأنا شايفاه عامل لايف! بلعت ريقي وخوفت ده يكون اللايف اللي هيقول فيه لقرايبه وأصحابه إنه هيتجوز وُرد. بلعت ريقي وأنا بشوفه بيظهر قدامي، حطيت إيدي على قلبي وأنا بشوفه لابس قميص أزرق، هو بيكره اللون الأزرق بس أنا دايما كنت بقول أن اللون الأزرق عليه حلو وهو كان بيعاندني ويقولي لا، بس النهاردة هو لبسه معرفش هو عمل كده قاصد إيه؟
ـ مالك مبلمة كده؟!
قالتها كريمة وهي بتُقرب مني، بصتلي بحيرة وهي شايفة سليمان عامل لايف:
ـ هو ده هيعمل إيه؟!
هزيت كتافي دليل إني مش عارفة. قعدت جنبي وقالت:
ـ ياللا خلينا نتفرج.
ـ أنا عارف أنك بتشوفيني دلوقتي يا رقية.
قالها فجأة فأنا اتخضيت وفضلت أبص حواليا وأقول:
ـ بسم الله الرحمن الرحيم، مراقبنا ده ولا إيه!!
بصيت على التليفون تاني، ابتسم وقال:
ـ أنا عارف كل عاداتك، حافظك زي ما حافظ نفسي، الإنسان يعرف كل تفاصيل روحه كويس، وأنتِ روحي يا رقية.
عيوني دمعت تاني فابتسم بحزن وقال:
ـ بس روحي دلوقتي سابتني وأنا ضايع، حاسس وكأن العالم كله أطاني ضهري، حاسس إني وحيد.
ضم إيديه جامد، دي كانت حركة بيعملها لما يحاول يسيطر على مشاعره سواء الغضب أو العياط، وقال بضحكة بسيطة:
ـ أنا عارف أن بعد اللايف ده هاخد تنمر من الناس ملوش آخر، بس مش مهم، مالي بالناس وأنتِ في حياتي؟ فاكرة يا رقية لما ماما ماتت أنتِ أول واحدة حضنتها؟ مكنتش عايز أشوف أي حد، مكنتش عايز إلا أشوفك أنتِ، كنتِ دايماً بتمثلي الأمان في حياتي، أنا طول عمري كنت بحبك أنتِ بس، يمكن غبائي خلاني أتوهم أني حبيت غيرك، أنتِ الجانب الأحلى في حياتي، الجانب المنور من حياتي، بس لما مشيتِ حسيت أن حياتي ظلمت، من وقت موت ماما محستش بالتوهان ده، محستش بالفراغ ولا اللخبطة دي، وكأن كان عندي كل حاجة وراحت من إيدي بغبائي.. ارجعي لي يا رقية، تعالي نوري حياتي تاني!
ـ فضحنا والله!
قالتها كريمة بضيق مصطنع، أنا ضربتها على كتفي ودموعي بتنزل وبضحك، كنت بضحك على الكومنتس الكتير اللي كانت على اللايف، كان كتير كاتب أن يا بختي وأن أرجعه حتى لو غلط، بس ضايقني تعليق بنت وحسسني بالغيرة لما قالت: “لو مش عايزاه يا ستي هاتيه عشان أحط في محمية لاحسن ينقرض”.
ابتسم وهو جاب الجيتار بتاعه وقال:
ـ عشان تعرفي إني بحبك هغنيلك الأغنية اللي بتحبيها لأمير عيد، كنتِ دايماً نفسي أغنيلك وأنا مكنتش برضى عشان صوتي وحش وعشان كمان مبحبش أمير عيد وبغير منه عشان أنتِ بتحبيه، بس هغنيله عشانك.
ـ أنا هسد وداني مقدماً.
قالتها كريمة وهي بالفعل بتسد ودانها، ضحكت أنا ورجعت أتفرج عليه. بدأ يعزف، كان عزفه وحش قوي بس أكيد مش أوحش من صوته لما بدأ يغني:
اتقابلنا مرة واحدة.. وكل مرة بستنى صدفة حلوة تجمعنايمكن تطير الوحدة.. مواضيع كتير حضرتها وسيناريوهات من غير عددإزاي أقرب منه وتشوفني يوم ظهر وسندأكون لها طبعاً أمير راجل خطر في الجدعنةتهرب في حضني بالساعات من ذكرياتها المحزنة…
خلص الأغنية فقالت كريمة:
ـ بجد صوتها وحش قوي!
كانت أنا دموعي بتنزل.
ـ قولتلك أنه بيحبك.
ـ مش عايزة أرجع دلوقتي.
قولتها وأنا قلبي واجعني.
بعد شوية؛ نزلت من بيت كريمة عشان أشتري حاجة، لقيت فجأة أحمد في وشي! بلعت ريقي وأنا بقول:
ـ سليمان!!
ـ ميعرفش أنك هنا، أهلك قالوا لي، أنا بس يمكن أعقلك خصوصاً أن مهما حصل إحنا زي الإخوات.
اتنهدت براحة فكمل كلامه:
ـ هو أثبت أنه بيحبك، نصيحة بلاش تخسري الحب ده، أنا يمكن غلطت في حقه من غير ما أحس بس سليمان صاحبي وأنا مش هقدر أشوفه بالحالة دي، كان باين عليه اليأس النهاردة.
كنت لسه هرد بس بصيت بصدمة لما لقيت سليمان جاي من وراه وعلي وشك علامات الشر!
ـ بتستغل الموقف يا أحقر واحد شوفتْه في حياتي!!!
وبعدين مسكه وفضل يضرب فيه!
ـ سليمان.. كفاية.. كفاية!
صرخت فيه وأنا بحاول أبعده عن أحمد، كنت متضايقة منه قوي، الغضب كان مسيطر عليا وأنا بشوف عينيه مليانة غيرة.
ـ أنت مجنون بجد!
زعقت فيه وحاولت أقرب من أحمد اللي واقع على الأرض حاطط إيديه على مناخيره اللي بتنزف وبيبص لسليمان بلوم، بس سليمان مسك إيدي وصرخ:
ـ تعالي معايا.. بقولك تعالي!
وكان فعلاً بيشدني.
قام أحمد بسرعة ومسك إيديه وبعده عني وهو بيصرخ فيه:
ـ فوق من غبائك بقى! هتخسر كل حاجة بسبب اللي بتعمله!! متبقاش مندفع زي الثور!!
ـ بتحاول تقلق مراتي عليا!! أنت إنسان…
ـ اسكت.. اسكت يا سليمان، أحمد كان جاي يقنعني أرجعلك بس يظهر أنه كان غلطان لما كان بيحاول يجمل صورتك قدامي، أنت هتفضل كده مندفع، أناني وبتجرح اللي قدامك من غير تفكير.
ـ رقية…
قالها بحزن فكملت:
ـ أنت جريت ورا مشاعرك من غير ما تفكر فيا حتى، ولما بعدت دلوقتي بتتصرف بالطريقة دي، أنت بلطجي! يعني بيسطرك أنك تضرب الناس؟ ده بيحسسك بالانتصار؟ يعني فعلاً كان عندي حق أني أسيبك، أنا مش عايزة أعيش معاك!!
بصلي بجرح، أنا قسيت عليه فعلاً بس حسيت براحة إني فضيت غلبي منه فيه، أنا كنت متضايقة من تصرفاته، متضايقة أنه تأخر أنه يعرف أنه بيحبني، عرف كده بعد ما قتلني!
ـ تعالي معايا، تعالي بيتنا وأنا هعملك اللي أنتِ عايزاه، كفاية يا رقية، عاقبيني بس في بيتنا لو سمحتِ.
قلبي واجعني وأنا بشوف نظرة الضياع في عينيه، أنا مقدرش أشوفه ضايع كده.
لفيت وأنا راجعة لبيت كريمة.
ـ رقية!!
قالها سليمان بيأس، فقولت من غير ما أبصله:
ـ رايحة أجیب شنطة هدومي وجاية معاك.
وبعدين مشيت.
بص سليمان لأحمد بخجل وقال:
ـ أنا آسف بجد، سامحني يا أحمد.
بص له أحمد بضيق وسابه ومشي.
ـ نورتي بيتك مرة تانية.
قالها وهو بيفتح لي الباب. دخلت بهدوء ورحت قعدت على الأنتريه، جه وقعد جنبي وهو بيبصلي بابتسامة فقولت بسرعة وبتوتر:
ـ أنا رجعت صحيح بس…
قاطعني وقال:
ـ بس أنا تحت العقاب، صحيح فاهم ده وحقك، قولتلك خدي الوقت اللي عايزاه في بيتنا.
بصتلهم بعيظ وقولت:
ـ اللي عملته مع أحمد مش مقبول أبدا، أنت عارف كده صح؟
حضن وشي بإيديه وقال:
