عارف وأنا آسف، بس أنا بغير يا رقية، مقدرش أتحمل أن حد يقرب منك، أنا دايماً بقول أنك ليا وأنا ليكي.
ـ وأنت فعلاً ليا يا سليمان!
قولتها وعيوني مدمعة، مسك إيدي وحطها على قلبه وقال:
ـ أنا ليكي وقلبي كمان، أدركت ده متأخر لأني كنت غبي، بس أنتِ كمان غبية! كنتِ قولي مش موافقة وأنا كنت هلغي كل حاجة عشان خاطرك.
ـ يعني أنا اللي بقيت غلطانة دلوقتي!!!
قولتها بغضب فضحك وهو بيحضني وقال:
ـ لا يا حبيبي، أنا اللي غلطان وأنا آسف.
نفخت بضيق وأنا بغمض عيني وبستمتع بقربه مني، فجأة فتحت عيني وأنا بحاول أبعده وقولت:
ـ لا أنت لسه متعاقب، ابعد!
ضحك وهو بيضمني أكتر وقال:
ـ يا ستي موافق أتعاقب، بس سيبيني أحضنك شوية، عيشتيني في رعب الأيام اللي فاتت.
بعد شوية كنت داخلة أنام، وقف قدام الباب وبيبصلي برجاء إني أدخله. ضحكت وعينيه بتفكرني بإيموجي مشهور وقولت:
ـ لا، مش هدخلك، وتصبح على خير.
نفخ بضيق وراح ناحية الأنتريه في الصالة ونام عليه. ضحكت عليه وأنا بهز راسي، وبعدين قفلت الباب ورحت أنام على السرير.
مرت الأيام وسليمان بيحاول بكل ما يقدر إنه يصالحني، محاولاته كانت بتضحكني قوي، كنت حاسة إني طايرة قلبي بيدق جامد قوي.
في يوم؛
ـ أنا عايزة أعرف أنت واخدني على فين كده مغمض عيني وسايق بيا، لتكون خاطفني؟
ضحك وقال:
ـ حاجة زي كده.
وقف فجأة وحسيت الهوا بيطير شعري وريحة البحر دخلت روحي.
ـ لو تعرفي قد ايه شكلك جميل دلوقتي، جميل أكتر من تخيلاتي عن الجمال يا رقية.
ضحكت ووشي أحمر وقولت:
ـ طيب شيل الغطا عن عيني، أنا عرفت إني في جنب البحر.
ـ لا.
قالها بهدوء، وبعدين حسيته بيقرب وباسني على خدي.
ابتسمت بكسوف، وبعدين طلع ومسك إيدي وهو بيساعدني أمشي.
ـ حاسب لاقع!
قولتها وأنا بضحك وبمسك إيديه جامد.
بعدين وقفني وشال الغطا من على عيني. فتحت عيني بصدمة وأنا بشوف ترابيزة عليها عشا من أكل المفضّل وشموع، وكان حوالين الترابيزة ورود كتير لونها أحمر لوني المفضل، كان اسمي مكتوب على كل بالونة.
عيوني دمعت وبصتلها وقولت:
ـ ده عشاني أنا؟!!
ـ ده قليل عليكي.
ابتسمت بسعادة فباس راسي وقال:
ـ أنا لو جبت العالم كله ليكي قليل عليكي يا ست البنات كلهم، أنا بحبك.
ـ وأنا كمان.
وبعدين أخدني وقعدني على الترابيزة، كنت وقتها أكتر وقت فرحانة فيه، يومها تأكدت إني الحب الأول والأخير ليه.
تمت
