صلها سليمان وهو حاسس بالإحراج والصدمة من أن قلبه مبيدقش وهي قريبة منه كده.
ـ أنا آسف بجد.
ـ أنا مبسوطة أنك اقتنعت أنك أخيراً بتحب مرتك مش حد تاني.
ابتسم سليمان ومشي، هو أدرك متأخر أن حب وُرد عشان هي بس ضاعت من إيديه، لكن مكانش حب حقيقي، حبه الحقيقي هي رقية، عرف ده لما قالتله عايزة تبعد إمبارح حس أن قلبي بيتعصر من الألم، بس خلاص هو مش هخليها تبعد عنه من النهاردة.
في بيت سليمان ورقية؛ دخل وهو ماسك باقة ورد حلوة قوي باللون الأحمر زي ما بتحبها هي.
ـ رقية حبيبتي..
قالها بسعادة بس قلق وهو مش سامع صوتها. جري على الأوضة واتصدم بدولابه المفتوح وهدومه اللي اختفت!
ـ رقية!!
قالها بصوت مخنوق وباقة الورد بتقع من إيديه، حس فجأة أن العالم فاضي، حس بخنقة. حك راسه وفضل يقول بصوت مخنوق:
ـ ليه؟ ليه يا رقية ليه عملتِ كده؟ ليه؟ أنا غلطت أه بس أهو صلحت غلطي بسرعة، ليه تحرقي قلبي؟ ليه؟!
قعد على الأرض وهو بيمسك الورد، اتخيل فعلاً أنه هيرجع يلاقيها لسه مستنياه بتبصله بلوم وزعلانة منه فيقوم يديها الورد ويعتذر منها ويقول إنه اكتشف أنها الوحيدة اللي معها مفتاح قلبه، بس كل أحلامه اتدمرت لما جه واكتشف أنها مشيت، حس نفسه طفل تايه، حس نفس الشعور اللي حسه لو والدته توفت؛ شعور الضياع، شعور الفراغ، شعور عمل المستحيل عشان ميحسوش تاني بس حسه، حسه تاني لما رقية اختفت، محسش الإحساس ده لما وُرد اتجوزت، بس حسه دلوقتي هو ضايع الفراغ اللي قلبه كبير.
فجأة هز راسه وقام وهو بيقول:
ـ لا، لا مستحيل أستسلم، أنا هرجعها مهما حصل.. هترجع!
مسك تليفونه وخرج. كان راكب عربيته وهو بيتصل بيها بس نفخ بضيق لما لقاها قافلة تليفونها.
ـ ماشي يا رقية، برضه مش هتهربي مني.
وقف عربيته قدام بيت والدها وطلع فوق. خبط على الباب ففتح ليه أبوها بصله بحيرة وقال:
ـ إيه اللي جابك دلوقتي يا سليمان؟ وفين رقية؟!!
ـ هي رقية مش هنا؟!
قالها بصدمة، فجات والدة رقية وقالت:
ـ نهارك أبيض! فين بنتي؟!!
كان قاعد حاطط عينيه في الأرض مكسوف من اللي عمله وخايف الموضوع يتعقد وأهل رقية ياخدوه منه.
ـ أنا قلبي مكانش راضي عن الجوازة دي وياما حذرتها، بس كل اللي كان على لسانها بحبها يا ماما، مش قادرة أعيش من غيره يا ماما، لحد ما بنتي قلبها اتكسر بسببك!
مكانش قادر ينطق حس نفسه صغير قوي، هو جرحها يستاهل أي عقاب بس عقاب أنها تسيبه ده صعب عليه، مش هيقدر يتحمله.
بدأ أبوها يتكلم ويقول:
ـ أنا لما عرفت أنك هتتجوز عليها كنت قررت أخد بنتي ونقفل سيرة بس هي وقفت في وشي وقالت أنها بتحبك وقالت أن ده شرع ربنا، وأنا عشان كنت شايف حبك في عينيها سكتت ومتكلمتش ولا عملت أي مشكلة، بس متجيش أنت وتكسرها بعد كده، أنا بنتي كانت معززة مكرمة في بيتي وترجع معززة مكرمة مفيش مانع!
بلع ريقه وقال:
ـ أنا غلطت وعارف، بس والله أنا بحب رقية ومش هقدر أسيبها، أنا هراضيها والله هراضيها بس هي فين؟
ـ يا بني هو أنت نسبة ذكاءك بالسالب ليه؟ ما قولنا مش عارفين هي فين، مفروض أنت اللي تدور عليها، ياللا دور على بنتنا وجيبها!!
ـ جالك كلامي أهو، سيبتِ البيت ومتحملتيش أهو.
قالتها كريمة وهي بتحط الأكل على السفرة. كنت قاعدة على الأنتريه ودموعي بتنزل لوحدها. قربت هي بشفقة مني ومسحت دموعي وقالت:
ـ هو قالك هينهي كل حاجة معنى كده إنه مش بيحبها ومش هيبقى تعيس يا رقية، أنتِ بتعذبي نفسك وبتعذ بيه ليه؟ سليمان بيحبك أنتِ وبس، كل تصرفاته اللي قُلتها تدل على ده.
هزيت راسي وقولت:
ـ أنا مش عايزاه يسيبها، مش عايزة أشوفه تعيس.
ـ يا الله يا ولي الصابرين، والله أنتِ هتنقطيني بجد، أنتِ غبية قوي!
لويت بوزي فضحكت هي وقالت:
ـ ياللا يا مجنونة عشان تاكلي وبعدين نتكلم.
قومت معاها فقالت فجأة:
ـ صحيح أهلك يا بت هيقلقوا عليكي؟!
ابتسمت وقولت:
ـ قبل ما أجي اتصلت بماما وقلتلها إني هقعد عندك وطلبت منهم ميقولوش لسليمان لأنه أكيد هيروح عندهم.
كان ماشي بعربيته وهو متضايق، مخه واقف، مش عارف راحت فين. اكتشف متأخر زي الغبي إنه محبش قدها، في وهم الحب الأول اللي كان عايشه كانت رقية هي الحب الأول والأخير، رقية هي المحطة الثابتة في حياته، هي اللي بيرجع لها في كل مرة، هي الساكنة الوحيدة في قلبه!
راح لبيت أخته، كانت بتبصله بشفقة وهو قاعد على الأنتريه راسه لفوق، بيفكر فيها، بيفكر في الست اللي امتلكته. غمض عينيه وافتكر يوم وفاة والدته كان مراهق وقتها ومتعلق بيها جداً.
فلاش باك
قفل الباب كويس وراح ناحية السرير وقعد عليه وفضل يعيط جامد، كان حاسس أن قلبه بيوجعه، كان مش قادر يتنفس، ووقتها الكل خبط عليه مكانش راضي يفتح لحد حتى أحمد صاحبه المقرب، بس هي خبطت عليه، أول ما سمع صوتها فتح الباب بسرعة وحضنها، حضنها وهو بيعيط.
باك
خرج من شروده وهو بيفكر أن رقية هي أمانه وهو مش هيخسر أمانه!
قام فجأة فبصتله أخته بحيرة وقال:
ـ أنا عرفت هرجعها إزاي!
كنت قاعدة في بيت كريمة وأنا ماسكة التليفون بتاعها واستخدمت الفيس بتاعها عشان أراقب الأكونت بتاع سليمان لأني قفلت موبايلي ومش عايزاه يوصل لي. كنت بفتح صوره وأنا بتأملها ودموعي بتنزل وبمسحها بسرعة وأنا مش عايزة كريمة تحس بيا. كان وحشني قوي، قلبي كان واجعني، يا ترى زعلان عليا ولا اعتبرني حمل وارتاح منه؟ ودلوقتي هيتجوز البنت اللي بيحبها، يارتني ما كنت اتجوزتك يا سليمان لو عرفت إني هوجع كده مكنتش اتجوزتك.
