اتصدم صدمة كبيرة ومقدرش يتكلم. الدموع بدأت تتجمع فى عنيه. حس بألم كبير فى قلبه. معقولة مش هيرجع يوقف تانى؟ مش هيصحى كل يوم ينزل يجري زى ما بيعمل! مش هينزل يتمشى لوحده فى نص الليل زى عادته! وشغله… أكتر حاجة بيحبها وبتهون عليه! ازاى هيقدر يبعد عن شغله.
فاق من شروده على صوت والدته إللى بتبصله وبتعيط:
متقلقش يا حبيبي هترجع أحسن من الأول ولله بس أنت احمد ربنا وخليك واثق إنه كاتبلك الخير.
متخفيش يا ست الكل أنت عارفه كويس إنه مفيش حاجة تقدر تكسر إبنك. اطمنى هنقوم ونرجع احسن من الأول.
بص حوليه ورجع بص لوالدته وقال بحزن:
ماما هى هنا مجتش.
لا يا حبيبي هى وأهلها قاعدين بره بس احنا طلبنا من الدكتور ندخل الأول نطمن عليك.
طيب ممكن اشوفها لو سمحت.
أكيد يا حبيبي أنا هطلع أنا والدك وندخلها.
هز رأسه بهدوء وفضل يفكر يبلغ هنا بقراره ولا يستنى شويه يكون فاق من صدمته. وإللى حصل رجع بضهره لوراء وقرر يشوفها هتعمل إيه من بعد الحادثة إللى حصلت! ياتره هتوافق تكمل معاه وتثبت للكل إنه اختار صح وعرف يختار بنت الأصول إللى توقف معاه على الحلوة والمرة، ولا هتكون سبب فى إنه يندم على اختياره طول العمر. رغم كل إللى بيفكر فيه إلا أنه قلبه كان بيتمنى ميتوجعش من أكتر إنسانة حبها وضحى علشانها بحاجات كتيره اووى، ووقف ضد ناس كتير علشان خاطرها وأولهم أهله إللى محدش فيهم كان موافق عليها، ورغم كده وافقوا لأجل خاطر يراضوا قلبه وميقفوش فى وش سعادته.
تيم.
اتنهد وبصلها.. كانت حاطة وشها فى الأرض وبتفرك إيديها بتوتر. ابتسم وقال بحنان رغم حزنه وزعله الكبير منها:
قربي واقفة كده ليه.
رفعت رأسها وبصت له بحزن على حالته وإللى شايفه إنها سبب فيها. مسحت دموعها وقربت:
أنا آسفة أنا حقيقي أسفة كل إللى حصلك بسببي.
ابتسم:
إللى حصل ده مكتوب يا هنا وربنا عاوزه كده أنت ملكيش دخل.
بس أنت مشيت وأنت زعلان منى وأنا ولله مكنتش اقصد نوصل لهنا.
قعدها جنبه وبصلها بحب:
خلاص انسى إللى حصل بس اوعديني متتكرش وإنك مش هتصدقى أى كلمة حد يقولهالك.
حاضر هحاول بس قولى أنت ناوى على إيه دلوقتي.
أنت إللى قررتي إيه.
بمعنى.
نزل رأسه لثوانى ورجع رفعها وبصلها بحزن:
يعني لحد امبارح كنت ناويه تنهى كل حاجة بينا، ودلوقتي أنا مش متأكد إذا كنت هقدر اقف على رجليا تانى أو لا. فأنت هتوافقي تكملى معايا بعد إللى حصل ولا لا، وياتره أنت لسه عند قرارك.
ابتسمت ومسكت إيده:
متقلقش هكون معاك فى أى خطوة وإنشاء الله هترجع توقف من تانى وأنا واثقة من ده. اما بخصوص إنى انهى علاقتنا فده مستحيل، المفروض إنك اتعودت إننا كل ما بنختلف بقول كده وبيبقا مجرد كلام.
كان هيتكلم بس الباب اتفتح فجأة… دخلت بنت يبان على ملامحها الطيبة لابسة نظارتها وعلى وشها إبتسامة لطيفة تشبه لها. قربت من تيم وقالت بلطف:
حمدلله على سلامتك.
ابتسم وتبت فى إيد هنا:
الله يسلمك.
اعرفك بنفسى أنا دكتورة ريم ناصر إللى هتابع حالتك.
وميتابعش حالته دكتور ليه.
تفرق فى إيه.
بصت لها هنا من تحت لفوق وقالت بغرور:
تفرق معايا أنا.
رفعت ريم حواجبها وبصت لتيم إللى قاعد مربع إيديه وبيتابع الحوار فى صمت… اتنهدت وقالت:
للاسف دكتور خالد هيكون خارج البلد الفترة ديه، ولذلك هكون أنا المسئولة مكانه، ولكن وعد اول ما يرجع هخليه يمسك حالته. ممكن بقاا تسمحيلي اشوف شغلى.
طيب اتفضلى.
قربت ريم وبدأت تفحص تيم وتشوف شغلها. اما هو فكان كل تركيزه مع هنا إللى ماسكة إيده وبتحاول تطمنه وتسيطر على غيرتها علشان متخليهوش يضايق وحالته تدهور بسببها.
حضرتك هتفضل عندنا كام يوم كده لحد ما نعمل كل الفحوصات اللازمة ونطمن عليك.
دكتورة هو هيرجع يمشى تانى مش كده.
قالتها هنا بقلق فابتسمت ريم وهزت رأسها بهدوء:
احنا هنعمل كل الفحوصات وكل إللى نقدر عليه وبإذن الله خير. بعد إذنكم.
اتفضلى.
ريم خرجت وتيم بص لهنا بيأس:
مش ناوية تبطلى غيرتك الزيادة عن الحد دي.
هو أنا اتكلمت دلوقتي.
هنا أنت عاوزه إيه.
مش فاهمة!!
أخد نفس وقال بتعب:
أنت مش وأخدة بالك إنك اتغيرتي اووى آخر فترة.
اتنهدت:
تيم أنا بغير عليك مش أكتر.
لف وشه الناحية التانيه وابتسم بسخرية:
قصدك بتشك فيا طول الوقت مش أكتر! ولو فضلتي كده يبقا الأفضل يا بنت الناس يبقا أنا من طريق وأنت من طريق، علشان أنا الفترة الجاية مش هكون حمل تعب نفسى ولله.
اتنفست وبصت له بضيق:
طيب ممكن نقفل على الموضوع ده دلوقتي.
بصلها بجمود وحط رأسه على المخدة:
تمام يا هنا أنا عاوز ارتاح.
طيب يا تيم أنا هسيبك ترتاح دلوقتي وبعدين نتكلم.
أخدت شنطتها وخرجت. وهو بص لطيفها بحزن وكل تفكيره: ليه مقدرش ينهى كل حاجة بينهم زى ما كان مقرر قبل الحادثة؟ ليه قلبه وجعة لمجرد الفكرة أنها تسيبه وتمشي؟ يمكن لأنها اول حب فى حياته والبنت إللى اتحدى الكل علشانها. طيب ياتره قصة حبه ديه هتكمل ولا هيجي يوم وتمل وتزهق منه… نام بعد تفكير وصراع كبير بين قلبه وعقله وحزن على الحالة إللى بقا فيها.
مر أسبوعين وتيم محجوز فى المستشفى وحالته النفسية فى النازل. بقا بيتعصب كتيرر على اتفه الأسباب. الولد إللى عمره ما طلب مساعدة من حد بقاا محتاج إللى يسنده طول الوقت. خلافاته مع هنا كترت بسبب وجود ابن خالتها كتير معاها. حزنه على نفسه وأنه مش قادر يتحرك خلى حالته تسوء أكتر. ولكن رغم كده كانوا أهله أكبر داعم ليه. الفحوصات أكدت أنه يقدر يعمل العملية ويستمر بالعلاج الطبيعي، وده عطاه أمل شوية. ولكن ياتره الأمل ده هيدوم وهيفضل!!
فتح عنيه على ضوء الشمس إللى سقط على عنيه. فرك فى عنيه بضيق. تعب من الأوضة المحبوس فيها والعلاج إللى بياخده، تعب من المستشفى وريحة الأدوية. أخد نفس عميق وبص للمرضة وقال بحزن:
لو سمحت.
افندم.
طلع تليفونه وفتح صورة هنا وبصلها:
البنت ديه مجتش خاالص الفترة الفاتت.
الممرضة هزت رأسها بحزن:
لا للاسف مشفتهاش خاالص.
