بصيت له بدهشة وأنا شايفا الغيرة بتلمع في عينيه بس قولت بهدوء:
ـ إيه اللي فتح الحوار ده دلوقتي؟
ـ حبيتيه يا رقية؟
ـ لو كنت حبيته يا سليمان كنت اتجوزته لما…
سكت شوية وبصتلها بصدمة وقولت:
ـ أنت ضربته عشان كده؟!
ـ غيرت عليكي.
اتنهدت وقولت:
ـ تعرف يا سليمان الست كمان بتغير! حبي ليك أكبر من حبك ليا، بس رُغم كده سمحت ليك تروح لغيري تخطب وتتجوز غيري، عارف ليه؟!
فضل باصصلي من غير ما يتكلم فقولت:
ـ عشان أنا عارفة أن سعادتك مع وُرد، وأنا مقدرش أشوفك سعيد.. بالنسبة لي أنت أهم مني، بس لو عكسنا الأدوار هتعمل كده؟
ميل راسه وبدأ الغضب ينتشر على ملامحه وقال:
ـ تقصدي إيه؟!
ـ أقصدي لو جيت وعرفت يوم أن سعادتي مع غيرك.. هتسيبني أبقى سعيدة؟
الغضب اللي في عينيه كان رهيب وهو بيقول من بين ضغط أسنانه:
ـ ده أنا أقتلك وأقتله!!!
ابتسمت بحزن، قرب هو ومسك إيدي وقال:
ـ مقدرش أتحمل أنك تبعدي عني، أنتِ بالذات يا رقية، أنا ممكن أخسر الكل عشانك، ممكن تصدقي اللي بقوله بس أنتِ أحسن حاجة حصلت في حياتي.
دموعي نزلت وقولت بصوت كله ألم:
ـ طيب ليه عايز تتجوزها؟ ليه عايز تقهرني؟ إزاي بتحبني وبتقول عايزها؟
ـ عشان بحبها هي كمان، أنا بحبكم أنتِ الاتنين وعايزكم أنتِ الاتنين، بس.. بس لو جوازي منها هيخليني أخسرك أنا مستعد أتراجع فوراً، أنا مقدرش أخسرك أنتِ بالذات، أنا مش عايز أخسرك يا رقية، مش هتحمل أنك تبقي لغيري، الفكرة نفسها مخلياني هتجنن، عشان خاطري يا رقية بلاش تقوليها مرة تانية، بلاش تلمحي انك ممكن تروحي لحد تاني، بلاش سيرة انك هتبعدي.
اتنهدت وأنا باحاول معيطش فكمل كلامه:
ـ لو جوازي من وُرد هيخليني أخسرك فهوقف كل حاجة.
عيوني دمعت جامد وقولت بصوت مخنوق:
ـ مش عايزة أنك تكون تعيس، اتجوزها يا سليمان.
ابتسم وهو بيلمس خدودي وقال بقلق:
ـ أنتِ مش هتسيبني؟!
هزيت راسي وأنا بكتم دموعي عشان متنزلش وقولت:
ـ مش هسيبك أبدا!!
وبعدين حضنني جامد وهو بيقول:
ـ شكراً أنك في حياتي.
حضنته وأنا دموعي بتنزل، حاسة قلبي بيتقطع بس مش قادرة أتكلم.
بعد عني وهو بيلمس شعري، وبعدين قرب من وشي بس أنا بعدت وشي وأنا بقول بتوتر:
ـ أنا تعبانة وعايزة أنام.
شوفت خيبة الأمل والقلق في عينيه بس ابتسم ليا وهو بيلمس شعري وبيقول:
ـ خلاص يا حبيبي، نامي وارتاحي.
هزيت راسي فكمل:
ـ بس ممكن أحضنك؟!
كان باين عليه الخوف، الخوف من أني أرفض قربه، فابتسمت ليه فحضني هو ونمنا.
تاني يوم؛ كانت خطوبة منة وسليمان. كنت قاعد قدام التليفزيون من الصبح، مكنتش بكلم سليمان رغم أنه كتير حاول يفتح معايا كلام، كان بيراقبني بتوتر، حتى أنه اختار يروح عند أخته ويجهز نفسه للخطوبة.
لقيته قرب وقعد قدامي على ركبته ومسك إيدي وهو بيقول:
ـ طيب ليه بتعامليني كده؟ ليه بتبعدي عني بالشكل ده؟ رقية أنتِ بتخوفيني.
حرقت الدموع عيني وقولت:
ـ أنت خطوبتك النهاردة من واحدة تانية غيري، ده صعب عليا يا سليمان، صعب قوي.. متضغطش عليا أبوس إيديك، زي ما هتحمل أن واحدة تانية هتكون في حياتك، اتحمل أنت تعاملي الفترة دي.
ـ هتحمل.
قالها بهدوء وهو ببوس إيدي.
بالليل؛ كان بيجهز في بيت أخته وهو بيصفر، بحاول يحسن مزاجه ويبعد الخوف من قلبه، أكيد رقية مش هتسيبه هي بتحبه مش هتسيبه، وهو مش هيسمحلها تبعد عنه، هيعمل المستحيل عشان تفضل معاه.
ـ أنت مش هترتاح إلا لما تخسرها.
قالتها نورا أخته وهي بتديله جاكيت البدلة. نفخ بضيق وقال:
ـ هلاقيه منك ولا من أحمد؟
ـ سليمان، رقية لو قررت تسيبك أنت هتضيع.
لبس الجاكيت وهو ببوس راس أخته وقال:
ـ أنا مش هسمحلها تضيع من بين إيديا، لو فكرت تسيبني هحبسها في البيت أو هخطفها بعيد.
هزت نورا راسها بيأس.
في بيت وُرد؛ كانت والدتها بتزغرد أن أخيراً بنتها قررت تنسى علي، أخيراً قررت تبص لنفسها.
كان سليمان مبتسم لوُرد اللي كانت في عالم تاني، قلبها واجعني، إزاي هتتخطب لحد وقلبها فيه حد تاني؟ هي لسه بتحب علي.
انتبهت لما سليمان اتكلم وقال بحب:
ـ متتخيليش أنا استنيت اللحظة دي قد إيه.. استنيت عمر بحاله.
حاولت هي تبتسم ليه بس مقدرتش فحطت عينيها في الأرض. جابت والدتها الدبل ومسكها وهو مبسوط، فجأة ابتسامته بهتت وهو بيشوفني قدامي بدخل من باب البيت بكامل زينتي!
قام بسرعة وقرب مني وهو بيقول:
ـ رقية! بتعملي إيه هنا؟!
ابتسمت وقولت:
ـ جاية أحضر خطوبة جوزي!
رقية!!
قالها سليمان بتوتر وهو بيبلع ريقه، كان متوتر أنا حاسة بيه.
ابتسمت بلطف وقولت:
ـ أنا مش جاية أبوظ خطوبتك يا سليمان، متقلقش.
ـ أنا قلقان عليكي.
ـ ليه تقلق؟ أنا كويسة، وياللا روح ميصحش كده، عروستك مستنياك.
بلع ريقه وهو بيبصلي، كنت ماسكة دموعي بالعافية، كنت حاسة أن قلبي بيتعصر من الألم، بس قدرت بمجهود إني أسيطر على دموعي.
فضل هو باصصلي وعيونه فيها ألم.
ـ ياللا روح لعروستك.
قولتها بصوت واطي، ابتسم وهز راسه بس ابتسامته كانت مش ابتسامة سعيدة بالمرة.
راح هو يلبسها الدبل وأنا ركنت شوية في مكان، كنت شايف أن أم العروسة بتبصلي بقرف بس مش قادرة تتكلم لأنها خايفة من سليمان.
كان قلبي بيتقطع وأنا شايفاه بيلبسها الدبل، كنت حاسة نفسي هنفجر في العياط في أي وقت، لعنت غبائي اللي خلاني أجي عشان أشوف بعيني جوزي وهو بيروح لغيري. قلبي اتعصر بقوة وأنا شايفاه بيبصلها بحب، حب كبير.. هو عمره ما بصلي بالطريقة دي.
بعد ما خلصت الخطوبة قرر يمشي على طول، احترمني ومحاولش حتى يقعد معاها.
كنت راكبة العربية معه، كان بيحاول يتكلم معايا ويخرجني من المود اللي أنا فيه، بس أنا مكنتش عايزة أتكلم بشكل واضح، ده اللي خلا ه يسكت بارتباك، قرر يشغل الراديو على أغنيتي المفضلة لعمرو دياب:
أنا عمري ما حد خطفني كده.. دا أخدني حبة حبةفي حاجات مش ممكن تستخبى ما بين اتنين أحبةفي دلع متشال لحبيبي وحنية من غير حساب.. طب وأعمل إيه؟
قفلت الراديو وقولت ببرود:
ـ متشغلش حاجة، مش عايزة أسمع.
