مش هتزعلي مهما كان اللي هقوله؟
قالها سليمان بتوتر، بصتلها وقولت بتأكيد:
ـ لا مش هزعل يا سليمان، أنت مش جوزي بس أنت صاحبي كمان، نسيت إننا كنا أعز أصحاب قبل ما نتجوز؟ أنا مبزعلش منك يا سليمان.
ابتسم وقال:
ـ عشان كده حبيتك يا رقية، حبيتك لأنك الوحيدة اللي بتفهميني وبتتفهُميني، وبتحبيني أكتر من نفسك كمان.
وشي أحمر وأنا ببص في الأرض. سليمان هو حب عمري، طبيعي أحبه أكتر من نفسي. حسيته تردد شوية ومسك إيدي وقال:
ـ أنا عايز أتجوّز.
وشي اصفر من الصدمة. حسيت أن عينيا بتحرقني وأني هعيط في أي وقت، رُغم أن على شفايفي كانت لسه الابتسامة مختفتش. كان هو بيراقب رد فعلي بقلق، قلقه أثر فيا، بس كلامه كسر قلبي. بلعت ريقي وأنا بسأل سؤال عارفة إجابته:
ـ فيه حد معين في بالك؟
ـ أيوه، وُرد!
كتمت دموعي وأنا باسمع اسم البنت اللي أخدت قلبه، البنت اللي لحد دلوقتي بيغلط ويقول اسمها بدال اسمي. وُرد كانت وما زالت الكابوس بتاعي؛ بنت حبها بجنون من أيام الجامعة، بس مكنش عنده الجراءة إنه يعترف لحد ما ضاعت منه وراحت لغيره، ووقتها ندم ندم إنه ضيعها، وفضل في حالة حزن لسنة تقريباً وأنا الوحيدة اللي وقفت جنبه، وعشان كده هو اتجوزني.
بلعت ريقي وأنا بفتكر عرضه للجواز ليا:
فلاش باك
ـ تتجوزيني يا رقية؟!
قالها فجأة فبصتله بذهول، ومن غير قصد وقع موبايلي من إيدي. ابتسامة صغيرة ظهرت على شفايفه وجاب موبايلي من الأرض وهو بيقول:
ـ يعني دي موافقة ولا رفض، مش فاهم؟!
ـ أنت مبتحبنيش!
قولتها وأنا كلي أمل إنه ينفي الكلام ده ويقول إنه بيحبني حتى لو هيكدب. هز راسه وقال:
ـ مش لازم الجواز يكون عن حب، اللي بيننا هيكون أحسن من الحب، اللي بيننا هيكون صداقة، هيكون عشرة، هيكون رحمة ومودة، مش لازم حب!
باك
رجعت من شرودي وأنا شايفاه بيبصلي بقلق، كان فعلاً خايف يخسرني. قولت بهدوء:
ـ لو دلوقتي خيرتك بيني وبينها، هتختار مين؟
ـ هختارك أنتِ.
قالها بسرعة وبدون تفكير، وكنت عارفة أنه صادق.. مبيكدبش عليا.
ابتسمت بحزن وقولت:
ـ بس رُغم كده هتكون تعيس، ودي فرصتك عشان تكون مع حب حياتك، صح؟
سكت ومتكلمش، فتنهدت وقولت:
ـ اتجوزها يا سليمان، اتجوزها وأنا مش هسيبك، بس طلبي الوحيد أنك متدخلنيش في حياتكم سوا، متتكلمش عليها قدامي، متتكلمش معاها وأنت معايا، أعمل فرحك وافرح بس بعيد عني، روحلها قد ما أنت عايز، بس لما تكون هنا في بيتنا تكون ليا وبس، متفكرنيش كل مرة أن في حياتك فيه حد غيري!
أنتي أكيد اتجننتي! هتجوزي جوزك؟! إيه الهبل اللي أنتِ فيه ده يا رقية؟
صرخت كريمة في وشي، بس أنا كنت هادية، كنت ماسكة بس تليفوني وأنا ببص على صورنا أنا وسليمان، الدموع كانت محبوسة في عيني بتعذبني.
أخدت كريمة من إيدي التليفون ورمته على الأنتريه وقالت بعصبية:
ـ أنتِ إيه البرود اللي أنتِ فيه ده يا بنتي؟ أنتِ بتسلمي جوزك اللي بتموتي فيه لواحدة تانية! أنتِ إزاي تعملي كده؟ كنتي بهدّتي الدنيا وفهمتيه إنك هسبي البيت لو عمل كده، كنتي خيرتيه بينك وبينها!
بصتلها بابتسامة باهتة وقولت:
ـ ما أنا عملت كده فعلاً، خيرته بيني وبينها واختارني أنا، بس لو كملت ابتزازه هيكون مبسوط؟ لا بالعكس، هيكون تعيس، وأنا مقدرش أشوف سليمان تعيس، مش هقدر يا كريمة.
حطت إيديها في وسطها وقالت:
ـ ويعني عشان حضرتك متخليهوش تعيس تبقي أنتِ تعيسة؟! تدمري حياتك بإيديكِ، هو ده اللي أنتِ عايزاه؟
غمضت عينيا ودموعي بتنزل وقولت:
ـ محدش عاقل عايز يكسر قلبه بإيده يا كريمة.
بصتلي وكأني اتجننت وقالت:
ـ أومال ليه بتعملي كده؟ ليه بتكسري قلبك بالشكل ده؟!
مسحت دموعي وقولت:
ـ عشان مكسرش قلبه هو يا كريمة، مقدرش أشوفه تعيس، أنا أبقى تعيسة مش مهم، المهم هو.
هزت كريمة راسها بيأس وقالت:
ـ أنتِ اللي هتعاني في الآخر.
ـ مش قادر أصدق، أنا رايح أتقدملها، رايح أتقدملها يا أحمد، أخيراً وُرد هتبقى ليا.
بص أحمد ليه وقال:
ـ ورقية يا سليمان؟
اتوتر سليمان:
ـ مالها رقية؟!
ـ أنت مش شايف أنك بتكسرها بالطريقة دي؟ المسكينة معملتش حاجة في حياتها غير أنها حبتك، مش دي اللي مفروض ترد بيها حبها.
ـ على فكرة، هي راضية.
قالها سليمان بضيق وهو بيحاول يخلص من شعور الذنب اللي في قلبه. هز أحمد راسه وقال:
ـ لا، هي مش راضية، هي بس مش عايزة تزعلك، هي بتحبك لدرجة أنها عندها أنها تبقي تعيسة طول حياتها ولا تحزن أنت لثانية واحدة. رقية هي أكتر حد حبك في الحياة دي، أكتر واحدة وقفت في ظهرك، أكتر واحدة بدتك على نفسها.
حس سليمان أنه مخنوق فقال:
ـ وأنا بحبها، بحبها يا أحمد، بس وُرد هي حب حياتي، أنا ندمت إني كنت جبان وضيعتها وسيبتها لحد ما اتجوزت، وأهي اتطلقت ومش هضيعها تاني.
اتنهد أحمد وقال:
ـ أعمل اللي أنت عايزه!
