الطاووس الابيض الجزء الثاني منال سالم

ما هو أكيد دي مش ليكي يا خلود!

تشنجت خوفا من عدائيته الواضحة وردت بتلعثم مذعور:

أنا.. كنت..
استغربت من توجه تفكيره للظن بتعاطيها لتلك النوعية من الأدوية، لكنه صدمها بسؤال كان وقعه عليها كمن لامس بدنه تيارا كهربيا شديد القوة:

ولا دي ليا وأنا مش عارف؟!

ألجمت الصدمة الممتزجة بالخوف لسانها، نظرت له في هلع بينما تابع هزه القاسي لها وهو يصرخ بها:

انطقي.. سكتي ليه؟
ردت بصعوبة وعيناها تهربان من نظراته التي تكشفها:

إنت.. فاهم غلط.
أرخى قبضته عن يدها التي اصطبغ جلدها بحمرة شديدة من ضغط أصابعه عليها، لوح بذراعيه في الهواء مكملا صياحه الهادر بها ليستنطقها:

طيب فهميني إنتي الصح بدل ما أنا واقف زي القرطاس كده قصادك.

برق عقلها بفكرة وكأنها تحاول تطويع الأمور لصالحها، استجمعت جأشها لتدعي كذبا:

ده.. بتاع.. هيثم.
ارتسمت أمارات الاستغراب المستنكر على وجهه وهو يقول في حيرة:

هيثم؟ وبيعمل إيه عندك؟
تنفست الصعداء حين رأت خدعتها تنطلي عليه وتابعت مسترسلة في كذب:

دي.. ماما لاقته عنده في الأوضة.. أيام المشكلة إياها مع البت خطيبته.. خافت يكون بيتعاطى حاجة فقالتلي أعينه هنا.

نظر لها في شك قبل أن يعقب متسائلا:

لا والله! طب وهي مرمتهوش في الزبالة ليه؟
تصنعت العبوس وجاوبته بضيق لتزعزع شكوكه نحوها وكأنها ليست الملامة في تلك المسألة الخطيرة:

معرفش.. اسألها.
علق بلهجة جادة أخافتها:

ما أنا لازم هسألها.
تماسكت أكثر بعد تحويل دفة الأمور نحو والدتها وأضافت بما يشبه الرجاء:

ماتنساش يا تميم إن هيثم ده أخويا وأنا خايفة عليه.. فمافيش داعي تكبر المسألة.

سدد لها نظرة غائمة وهو يقول بصوته المحتقن:

وماله.. حقك، بس بتكدبي عليا ليه؟
ارتفع حاجباها للأعلى في توتر بينما أكمل بتشنج والاتهامات التي تدينها تتصاعد في عينيه:

لأ وتقومي تتسحبي في نص الليل زي الحرامية عشان تبدلي الدواء أل يعني مكفراني نايم على وداني مش دريان بحاجة!
هتفت تلومه ومبررة تصرفها:

خفت تعمل مشكلة تانية معاه ولا حتى تضربه واحنا مصدقنا حاله ينصلح.

هدر في تهكم ساخط:

يا سلام على الطيبة!!
ارتخت أعصابها المشدودة قليلا شعرت أن الكفة رجحت مجددا لصالحها مما أكسبها المزيد من الثقة وردت بصوتها الذي غلفه الضيق لتبدو مقنعة في غضبها منه:

إنت عارف احنا كلنا يهمنا مصلحته، أكيد مش هابقى عاوزة أضر أخويا، وإنت لو مكاني هتعمل اللي تحافظ بيه على أهل بيتك، ما تلومنيش لما أحاول أحميه.

نظر لها مطولا بغموض لم تعرف إن كانت نظراته النافذة نحوها جعلته يصدقها أم لا، وباقتضاب قال لها:

ماشي يا خلود.
خشيت من تبعات ردة فعله غير المتوقعة فالأمر تلك المرة اتخذ منحنا آخرا لم ترتب له جيدا، وكما عهدته لم يكن ليمرر تلك المسألة دون تحقق متعمق فيها، لهذا سألته وقد ضاقت عيناها:

إنت مش مصدقني؟
أومأ برهة قائلا:

هنشوف.
نظرت في عينيه قائلة بثبات:

اطلب أمي لو عاوز تتأكد وهتعرف منها الحقيقة..

ثم وضعت يديها على ذراعيه ضغطت برفق على عضلاته وأسبلت عينيها نحوه، تنهدت ببطء لتعاود تسول عواطفه وهي تهتف:

تميم، أنا بحبك ومقدرش أبعد عنك، نفسي نرجع زي أول جوازنا، الحياة بينا كانت أحسن من دلوقتي كفاية تعذب فيا.
ولتظهر شغفها به استطردت هامسة له بحرارة وقد اقتربت منه:

أنا محتاجة حضنك أوي.
نبذها عنه قائلا بجمود والجفاء يظهر في نظراته نحوها:

مش وقته.

أنقذه من دلالها رنين هاتفه المحمول، أجاب على اتصال والده به قائلا بزفير متعب:

أيوه يابا.. لأ أنا جاي على طول، كان ورايا مصلحة كده تمام ومش هتأخر.
أنهى المكالمة معه ونظر لها ليقول وهو يشير بسبابته:

هنتكلم أما نرجع.
رسمت بسمة ناعمة على شفتيها حين ردت:

حاضر يا حبيبي.

تبعته في خطواته متسائلة:

عاوزني أطبخلك إيه على الغدا؟
رد بتجهم:

هاكل مع الرجالة، عندنا شغل كتير.
دعت له من خلفه وتلك البسمة المتكلفة تزين محياها:

ربنا يقويك يا حبيبي أدها وإدود.

ظلت تسمعه بكلماتها المحفوظة عن ظهر قلب والتي تشد بها من أزره إلى أن خرج من المنزل وأغلق الباب وراءه. اندفعت عائدة إلى غرفة النوم بخطوات أقرب للركض، أمسكت بهاتفها المحمول واتصلت بأحدهم، وضعت الهاتف على أذنها وصاحت بأنفاس مضطربة ودون مقدمات حين سمعت صوت والدتها:

أيوه يامه، في مصيبة حصلت!!!!

……………………………………………………………

ألقت نظرة أخيرة مدققة على حقيبة ظهرها التي ملأتها بما تحتاج إليه من أدوات لتستخدمها في وظيفتها الجديدة مع رفيقتها علا التي عرضت عليها العمل معها في محل تغليف الهدايا الذي تديره في وقت فراغها. لم ترفض فيروزة عرضها، كانت بحاجة ماسة للنقود لتسدد الالتزامات الملاقاة على كاهلها.. رأتها والدتها فأقبلت عليها تسألها باهتمام:

مش هتفطري برضوه يا فيروزة؟
أجابت نافية وهي تشد السحاب لتغلقها:

لأ يا ماما، ورايا كام مشوار كده هاخلصهم وبعدين عاوزة ألحق أروح لعلا عشان نجهز ديكورات السبوع، يدوب الوقت يكفي بحيث نسلمها قبل العصر.
ربتت على كتفها وقالت كنوع من الدعم لها:

ربنا معاكو يا بنتي ويكرمكم.

ابتسمت تقول في تعب:

آه يا ماما إدعيلي، لو الشغل بتاعنا ده ظبط هنتشهر أوي.. الحاجات دي بتاكل مع الناس.
ردت بحنو أمومي:

أنا بأدعيلك من غير ما توصيني يا فيروزة.
حركت رأسها في استحسان وعلقت حقيبتها على كتفها استعدادا للذهاب، استوقفتها آمنة متسائلة:

قوليلي، لسه زعلانة من أختك؟

تنفست بعمق لتثبط ما يعتريها من مشاعر مستاءة وردت بوجوم:

هي حرة وأدرى بمصلحتها عني.
مسحت أمها برفق على ذراعها وقالت لها بنظرات متوسلة:

إنتو بقالكو كتير متخاصمين، وهي مضايقة إنك واخدة جنب منها وده آ….
قاطعتها بحدة ملحوظة:

ولا واخدة جنب ولا حاجة، كل الحكاية إني ماليش دعوة بأي حاجة تخص الجوازة دي.
رجتها بغصة عالقة في حلقها:

يا بنتي، إنت بس لو تسمعيها تفهمي هي عملت كده ليه.
قالت بحسم لتنهي النقاش في تلك المسألة:

سمعت اللي أنا عاوزاه، خلاص كلامي مالوش لازمة معاها ولا هيقدم ولا يأخر، ويالا عشان اتأخرت على علا.

تحركت في اتجاه باب المنزل لكن اعترضت همسة طريقها واستطردت تقول وعبراتها الرقراقة تحتجز في حدقتيها:

فيرو أنا …
لم تترد في تجاهلها بقساوة بعد موقفها الأخير الذي أحرجها وأخذلها. تجاوزتها قائلة ببرود:

سلام يا ماما.